Ragnheiður Gröndal

Ragnheiður Gröndal er fædd og uppalin í Garðbæ og er því góðkunn okkur Garðbæingum sem og flestum Íslendingum fyrir tónlist sína og óaðfinnanlega söngrödd. Ragga eins og hún er kölluð fæddist árið 1984 og hefur hún frá blautu barnsbeini haft brennandi áhuga á tónlist og öllu sem viðkemur henni. Hún útkskrifaðist úr FÍH sem djasssöngkona og hélt svo út til New York þar sem hún stundaði framhaldsnám.
Ragga hlaut íslensku tónlistarverðlaunin árið 2003 sem bjartasta vonin og söngkona ársins.

Við höfðum samband við Röggu og fengum hana til að svara nokkrum spurningum fyrir okkur.

Hver er Ragga Gröndal?

Ragga Gröndal er íslensk tónlistarkona, búsett í Reykjavík.

Hvað hefur þú verið að gera upp á síðkastið?

Ég hef verið mest upptekin við að vera móðir, en einnig er ég alltaf að syngja út um allt fyrir hina og þessa, halda tónleika, vinna í nýju efni og stunda jóga.

Hvernig hefur tónlist þín þróast frá því þú byrjaðir fyrst að vinna með tónlist?

Hún hefur þróast gríðarlega mikið. Með tímanum hef ég komist nær og nær kjarnanum í sjálfri mér sem tónlistarkonu og áttað mig á því hvað ég vil og vil ekki. Ég hef öðlast meiri styrk og sjálfstraust til að þora að vera það sem ég er og standa með sjálfri mér. Söngstíllinn minn hefur líka breyst, ég er orðin miklu frakkari í dag við að láta vaða og leyfa öllum hljóðum sem koma úr röddinni minni að vera til. En ég hef líka verið mjög leitandi og stundum sé ég eftir því að hafa gefið út svona margar plötur með alltof ólíku efni í staðinn fyrir að hafa haldið mig við einn stíl eða að minnsta kosti stíl sem fylgir einhverri láréttri línu svo fólk viti svolítið að hverju það gengur þegar það kaupir plöturnar mínar. Í staðinn er ég eins og óvissuferð, fólk veit ekkert hvað það fær næst. ;) Ég hef alltaf reynt að fylgja listamannshjartanu mínu, frekar en að reyna að þóknast aðdáendum mínum. Ég held að það sé köllun allra listamanna - að vilja deila með fólki sínum persónulega hugarheimi og sýn - og það gerir líka menninguna okkar fjölbreyttari og ríkari. ;)

Þú gafst út plötuna Astrocat Lullaby árið 2011 hvernig voru viðtökurnar?

Viðtökurnar voru mjög góðar, frábærir dómar í öllum blöðum, hún lenti á Kraums-listanum yfir 20 bestu plötur ársins, og síðast en ekki síst frábærar viðtökur frá aðdáendum mínum sem margir vilja meina að þetta sé besta platan mín. En ég gaf hana út sjálf, það var dálítill barningur og ég held að hún hefði getað selst aðeins betur með meiri markaðssetningu. En mér finnst fólk vera að kveikja á henni á lengri tíma, eða ég vona það…..

Hvað er framundan hjá þér?

Ég er á fullu að vinna með tónlistarkonum í nýstofnuðu félagi okkar sem heitir KÍTÓN og stendur fyrir Konur í tónlist. Við ætlum að fara á tónleikaferðalag um Ísland í ágúst en síðan fer ég sjálf á tónleikaferðalag til Þýskalands í október til að fylgja eftir Astrocat Lullaby, en hún kom út þar á síðasta ári. Ég hlakka rosalega til, því það hefur verið draumur minn lengi að fara og spila mína eigin tónlist annars staðar, fyrir nýtt fólk.

Lýstu stílnum þínum í fimm orðum

Kærulaus, fullkomnunarsinni, gamaldags, seiðandi og sjálfstæð.

Hvar kaupir þú helst fötin þín?

Ég versla mest vintage föt, t.d. í Rokk og rósum og Nostalgíu og ég elska að versla í Berlín. Svo finnst mér gaman að kaupa íslenska hönnun og hef verið að vinna dáldið með Aftur kjóla upp á síðkastið. Þeir eru fallegir og tímalausir og hægt að klæða þá upp og niður. Hins vegar enda ég alltaf í vintage fötum aftur því mér finnst ekkert toppa þau snið, þau eru kvenleg og hæfa mér mjög vel því ég hef aldrei verið mjóna. ;)

Hver er uppáhalds flíkin þín?

Ég á mjög margar uppáhalds en akkúrat núna held ég að það sé grænn Nina Ricci kjóll sem ég datt niðrá í Nostalgíu þegar ég var að leita mér að fötum fyrir Blúshátíð Reykjavíkur.

Hver eru bestu kaup sem þú hefur gert?

Nýlega…. sennilega vintage kápa sem ég keypti í Berlín 2012, geggjað snið og efni og ég fæ hrós alls staðar þar sem ég mæti í henni.

Hver eru verstu kaup sem þú hefur gert?

Úff, þau eru mjög mörg skal ég segja þér. Veit varla hvar ég á að drepa niður. En ætli það sé ekki samfestingur sem ég keypti á kílóamarkaði í Spútnik einhvern tímann og var gert endalaust grín að…. hann var úr bómullarefni með gylltu dreka-prenti, svosem ekkert út á það að setja, en sniðið….maður minn, held að það hafi náð hæðum í asnalegaheitum og var skýrt dæmi um flík sem gerði akkúrat ekkert fyrir mig.

Eitthvað að lokum?

Langar að deila með ykkur tónleikum sem verða núna í Viðey á miðvikudagskvöldið. Þar koma fram auk mín, Lára Rúnars, Hafdís Huld, Greta Salóme, Védís Hervör, Ísabella Leifsdóttir, Hallfríður Ólafsdóttir, og DJ Andrea Jóns. Við ætlum að kokka saman upp Kvennafrídags-seið og ég lofa góðum tónleikum og partýi.

Facebook viðburður:

https://www.facebook.com/events/348423755285150/

Hér má kaupa miða:

http://midi.is/tonleikar/1/7674/

Hér er Ragnheiður Gröndal í græna uppáhalds kjólnum sínum